幼教老師的辛酸

呢2日「幼教老師的辛酸」竟然成為新聞，作為一個做咗廿幾三十年教育呢行嘅我，有啲嘢想講。

比起同樣係教師嘅工作，人工低係真嘅，有時為咗教學，仲要自費買教材呢！

工作量多，都係真係嘅，有幾年我經常OT到晚上11點，不過未完，返到屋企都仲要做。

幼教老師咩都要教都係真嘅，語文（中，英），數概，常識，視藝，體育，音樂，品德。即係你咩都要識。

放假好多日，就唔一定係真，因為有啲園係只放大假同例假，同一般打工仔無分別，但大假唔係你想放就放，小朋友要返學你唔可以放。

而且就算放假，都係要留返啲日子去完成工作， （教案，評估，下學年教學進度，同家長溝通，大型活動嘅計劃書）唔係寫出嚟就得，仲要整埋sample。

如果要負責大型慶典，咁樣就足足幾個月都日日要OT㗎啦！

而且仲要高EQ咁處理小朋友嘅問題，哭鬧瀨尿已經係小事，打交咬人就大件事，老師們要一眼關七咁去睇住，唔可以俾呢啲事件發生，執生能力同抗壓力低啲都唔掂。

講到呢度……咁辛苦點解仲有人做？

因為做到又留低嘅同工都係有愛心，有責任感，同埋使命感，真心覺得幼兒階段嘅發展係最重要，小朋友嘅一生，好大程度係俾呢幾年影響，所以，我要向任何崗位上的幼教同工們致敬！！

有人會問：間學校得一個老師？當然唔係啦！個個人都一樣咁多嘢做，有時已經係一組人一齊去做，但工作量太大，學校人手就係咁多。

我曾經有間園，有大型活動時，個校長係會同我地一齊OT，一齊做，平時仲好好唔俾我地遲收工。

我亦遇過一啲校長，指手劃腳叫你OT，然後自己每天朝9晚5的。

好多年前，因為幼師薪金一直都唔跟point，同中小學好唔同，人工加幾多有無得加完全係間園話事，而且一轉園，人工就會同一個剛剛出嚟做嘢嘅人無分別，所以曾經出現過一輪示威遊行爭取福利，2009 年 5 月「逼檢討學券制」遊行： 幼師與校長抗議學券制（幼稚園學券計劃）推行後行政工作量暴增，提出五大訴求：設立幼師薪級表、改善師生人手比例與設立空堂、提供行政支援人手、檢討全日制資助計算、按物價調整學券額。

2011 年 1 月「3600人促 15 年免費教育」大遊行： 近 3,600 名幼師、學生和家長在中環遮打花園集合遊行至政府總部。核心訴求為要求政府落實 15 年免費教育、徹底取消千瘡百孔的學券制，並要求恢復幼師薪酬架構（薪級表），以保障幼師的基本飯碗與晉升前景。

後續影響： 經過業界長年爭取，港府最終於 2017/18 學年起正式推行「免費幼稚園教育計劃」（現稱幼稚園教育計劃），大幅增加了對幼稚園的直接資助。

薪金上的確有所提升（但仍然存在轉園就重新計算），但工作量同樣增加。

中小學老師可以有空堂去處理佢地嘅非教學工作，但幼教老師是沒有的，你說又點會唔使OT?

雖然我已不在前線，但真心希望，幼教老師們可以得到更好的待遇，工作量多不要緊，但同時也要俾足工作時間，薪金與工作量相符，這樣就好了。